U pogledu tvom

(mom ocu)

U pogledu tvom, 

ča već se zamuti,

stalo je vrime ča stalno nan biži

sva tvoja juga i bure

svi tvoji kameniti puti.

Svi puti če hodi si njima,

masline i lozje, 

sve zime i lita

i smih i radost i pisma,

i kad ne vidi nikor,

niko suza skrita...

Iz pogleda tvog, 

ča jos me gledo

sa isto noliko jubavi

sa isto noliko brige

iz bora ča hi je ispisalo vrime

čitan ti život  ko iz knjige.

Ostala je već za tobon

gora tvoja, i petroda

ovce tvoje i tovari,

ostala je pusta štroda...

I no ditelina ča si je kosi

i marenda ča doma si nosi

i no, ča bis bi uvik mater pito,

sjećon se neka molo san bila,

za stolon umoran i potan -

a jesu dica jila...?

Uspori se tvoj hod,

nimo već nikakove priše,

život ko vapor nestaje za punton

a zvon sa kampanela tuče sve tiše.

Sve ono lipo i grubo

skoro je pasalo, ćale moj

i baš nako kako si reko -

i dobren i lošen, svemu dojde kroj.

U pogledu tvomu, 

ča već se zamuti, 

cili tvoj život,

svi tvoji puti...

(22. 07. 2014.)