Stojidu, stojidu
već puno godišć
muoga ditinjstva dvuori.
Di se još vididu stope ol maške Lize
kal je no bila ugazila u friški bidun...
U njima san se igrala na bebe,
obučivala hi i prisvučivala,
utrpovala da njima ne bude zima.
Robicu san šila soma
od krpih če mater imala doma.
Pratila kad mačice prvi put
izlazidu iz konobe
(Bože muoj, nista slaje
na vien svitu nimo)
gledola kako se kozlići jedon na drugega zaskakijedu,
penjala se po orihu
i zamišjala da mi je to autobus.
Hronila san kunce
a imali smo i dvo tovara.
Jednega Crnega, otac ga je zvo Muoro,
i jednega Bilega,
ko ni če Isus jaho na njemu.
I svaki put, kad duojden doma,
začudin se
kako ti doni nisu ninder išli.
Uvik su tuol, na isten mistu.
Uvik su tuol, u mojien srcu.
Di ćedu ostat i kad oslabi
i vid i sluh,
i kad već ne buden mogla pisat
svoje pisme,
zauvik ćedu ostat tuol.
Jerbo su mi se ucrtoli u dušu
ko onije stope ol maške u bidun,
i vodidu me, svitlidu mi
ko lantierna
kroz ovi život
di čiesto ni sve bajno i krasno...
Tako van je to, judi moji.
Čovik se uvik domu vraćo.
/photo by Milena Covic
Nema komentara:
Objavi komentar